ABŞ qadınların hüquqlarını pozan əfqan siyasətçilərinə qarşı viza məhdudiyyətləri tətbiq edib

Bakı, 2 fevral, SalamNews. ABŞ dövlət katibi Entoni Blinken Əfqanıstanda qadınlara qarşı ayrı-seçkilik siyasəti ilə bağlı Taliban üzvlərinə qarşı viza məhdudiyyətləri tətbiq edib. 

SalamNews-un "TASS"a istinadla verdiyi xəbərə görə, Blinkenin bəyanatını Dövlət Departamentinin mətbuat xidməti yayıb. 

"Bu gün mən Əfqanıstanda qadın və qızların repressiyasına görə məsuliyyət daşıyan Talibanın bəzi hazırkı və ya keçmiş üzvlərinə, qeyri-dövlət təhlükəsizlik qruplarının üzvlərinə viza məhdudiyyətləri tətbiq etmək üçün tədbirlər görürəm", deyə bəyanatda deyilir. 

Amerika hökuməti Talibanın addımlarını kəskin şəkildə pisləyir. 

"Birləşmiş Ştatlar əfqan xalqının yanındadır və qadın və qızlar da daxil olmaqla, bütün əfqanların insan hüquqları və əsas azadlıqlarına hörmətin təşviqi və dərinləşdirilməsi istiqamətində mümkün olan hər şeyi etmək siyasətinə sadiqdir", deyə Blinken vurğulayıb.