Çavuşoğlu: Türkiyə İrandan Azərbaycan səfirliyində terror aktına aydınlıq gətirməsini gözləyir

Bakı, 28 yanvar, SalamNews. Türkiyə İrandan Azərbaycanın İrandakı səfirliyinə silahlı hücumun bütün məqamlarına ən qısa zamanda aydınlıq gətirməsini gözləyir.Bu cinayətin arxasında kimin dayandığını müəyyən etmək vacibdir.

SalamNews-un "AA"ya istinadla verdiyi xəbərə görə, bunu şənbə günü Türkiyənin xarici işlər naziri Mövlud Çavuşoğlu bildirib.

Nazir xatırladıb ki, son vaxtlar Azərbaycanın xaricdəki müxtəlif diplomatik nümayəndəliklərinə qarşı terror aktları qeydə alınır.

"Parisdə iki insident baş verib. Həmçinin Livanda radikal ermənilərin qanunsuz əməlləri qeydə alınıb. Daha bir radikal qrup Azərbaycanın Londondakı səfirliyinin ərazisinə daxil olub. Nəhayət, Azərbaycanın İrandakı səfirliyinə dünənki terror aktı", deyə nazir qeyd edib. 

Çavuşoğlu Tehrandakı qanlı hücumun tam mənzərəsinin aydınlaşdırılmasının vacibliyini vurğulayıb və “İran və Azərbaycan arasında səmimi əməkdaşlığa” ümid etdiyini bildirib. 

"Qonşu İrandan bu terror aktının səbəbini və sifarişçilərinin kimliyinə dair aydınlığın gətirməsini gözləyirik. Bütün məlumatlar Azərbaycan tərəfinə verilməlidir. Biz bunu vacib hesab edirik. Bu hadisəni törədənlərin hamısı məsuliyyətə cəlb edilməlidir", deyə diplomat əlavə edib. 

Çavuşoğlu bir daha vurğulayıb ki, “Azərbaycan heç vaxt tək olmayıb və olmayacaq da!”. 

Yanvarın 27-də Bakı vaxtı ilə saat 08:30-da Azərbaycanın Tehrandakı səfirliyinə silahlı basqın edilib. Hücum nəticəsində səfirliyin mühafizə rəisi həlak olub, 2 mühafizəçi yaralanıb.

Prezident İlham Əliyev insidenti “terror hücumu” adlandırıb. Azərbaycan Xarici İşlər Nazirliyi Tehrandakı diplomatik missiyanın əməkdaşlarını və ailə üzvlərini təxliyə etməyi planlaşdırdığını açıqlayıb.