İraq və Fransa strateji əməkdaşlıq müqaviləsi imzalayıb

Bakı, 27 yanvar, SalamNews, S.Bağırov. İraq və Fransa arasında strateji əməkdaşlıq müqaviləsi əl-Sudani və Makron tərəfindən Parisdə imzalanıb.

SalamNews xəbər verir ki, İraqın baş naziri Məhəmməd Şiya əl-Sudani bu barədə tvitter səhifəsində yazıb.

O, Fransa prezidenti Emmanuel Makronla görüşdən sonra Fransa ilə ortaq əməkdaşlıq müqaviləsi imzalandığını açıqlayıb və bununla bağlı yazıb:

“Mən və dostum Makron iki ölkə arasında əməkdaşlığın inkişafı üçün yol xəritəsini əks etdirən strateji əməkdaşlıq sazişi imzaladıq”.

Əl-Sudani əlavə edib: İqtisadi islahatların və davamlı inkişafın təmin edilməsi məqsədi ilə hökumətin planlarında proqnozlaşdırdığımız kimi, ciddi əlaqələr üçün dostlarımızla əməkdaşlığı davam etdirəcəyik.

İraqın baş naziri dünən bir günlük rəsmi səfəri çərçivəsində Parisə gedib və Makrondan əvvəl Fransanın baş naziri Elizabet Born da daxil olmaqla bəzi yüksək rütbəli Fransa rəsmiləri, həmçinin xarici işlər, neft, sənaye və mədən, mədəniyyət nazirləri ilə görüşüb.