Rəcəb ayının biri imam Məhəmməd Baqirin (ə) mövlud günüdür

Bakı, 23 yanvar, SalamNews. Hicri-qəməri tarixi ilə bu gün, rəcəb ayının biri müsəlmanların beşinci imamı həzrət Məhəmməd Baqirin (ə) mövlud günüdür.

SalamNews xəbər verir ki, İmam Məhəmməd Baqir (ə) hicrətin 57-ci ilində Mədinədə dünyaya göz açıb. Babasına çox bənzədiyi üçün o həzrətin adı Məhəmməd qoyulub. Elmin sirlərini aşkar etdiyinə görə isə ona Baqir ləqəbini veriblər.

İmam Məhəmməd Baqirin (ə) imamlıq dövrü atası imam Səccadın (ə) şəhadətə yetişməsindən sonra təqribən 20 il davam edib.

İmam Baqir (ə) və İmam Sadiqin (ə) dövrü Abbasilərlə Əməvilərin siyasi çəkişmələri və daxili müharibələri dönəminə təsadüf edib və buna görə hakimiyyət imamları əvvəlki kimi təqib etməyib. İmamlar bu fürsətdə dini-ilahi maarifin təbliği üçün mühüm addımlar atıblar. İmam Baqir (ə) və İmam Sadiqdən (ə) hədislərin daha çox nəql edilməsi və bizə onlardan kəlamların daha çox gəlib çatması da bu siyasi-citimai amildən irəli gəlir.

İmam 114-cü hicri-qəməri ili zilhiccə ayının 7-də xəlifə Hişamın əmri ilə zəhərlənərək şəhid edilib. O həzrətin məzarı Mədinə şəhərində Bəqi qəbristanlığında, digər 3 imamın yanında torpağa tapşırılıb.