FT: Böyük Britaniya Brexit səbəbindən rekord işçi çatışmazlığı ilə üzləşib

Bakı, 17 yanvar, SalamNews. Böyük Britaniya Aİ-dən çıxması və Avropa dövlətləri ilə işçi qüvvəsinin sərbəst hərəkət rejimini ləğv etməsi nəticəsində rekord işçi çatışmazlığı ilə üzləşib.

SalamNews "TASS"a istinadla verdiyi xəbərə görə, bu barədə bazar ertəsi "Financial Times" qəzeti yazıb. 

“UK in a Changing Europe” və “Centre for European Reform” beyin mərkəzlərinin birgə araşdırmasının nəticələrinə görə, 2022-ci ilin iyununda Britaniya 330 minə yaxın işçisini itirib ki, bu da ölkənin əmək qabiliyyətli əhalisinin 1%-nə bərabərdir. 

Tədqiqatçılar qeyd edirlər ki, Aİ ölkələri ilə sərbəst hərəkət rejiminin ləğvi logistika, tikinti və müştərilərə xidmət kimi aşağı ixtisaslı əmək sektorlarına xüsusilə güclü təsir göstərib. 

Məsələn, yüklərin daşınması və saxlanması sahəsində işçi qüvvəsi çatışmazlığı 128 min nəfərə çatıb ki, bu da bu sektorda çalışan işçilərin ümumi sayının 8 faizini təşkil edir. 

Biznes nümayəndələri hökuməti lazımi tədbirlər görməyə, o cümlədən azsaylı peşələr siyahısında islahatlar aparmağa çağırırlar, çünki əmək uğrunda rəqabətin artması inflyasiyanı artırır.