İraqın Diyala əyalətində hava zərbələrində İŞİD-in dörd üzvü zərərsizləşdirilib

Bakı, 13 dekabr, SalamNews, S.Bağırov. İraqın İranla sərhəddə yerləşən Diyala əyalətinin Qara-Təpə nahiyəsində İŞİD-in gizli sığınacağı aşkarlandıqdan sonra əraziyə hava zərbələri endirilib.

SalamNews Sumariya agentliyinə istinadən xəbər verir ki, bu barədə təhlükəsizlik mənbələri məlumat veriblər.

Bildirilib ki, Qara-Təpə nahiyəsində İŞİD terror təşkilatı üzvlərinin gizləndiyi sığınacaq aşkarlandıqdan sonra Hava Qüvvələrinin F-16 təyyarələri əraziyə aviazərbələr endiriblər.

Ölkə ordusunun Hərbi Kəşfiyyat İdarəsindən daxil olan dəqiq məlumatlardan sonra həyata keçirilən bu əməliyyatda terror təşkilatının dörd üzvü zərərsizləşdirilib.

Qeyd edək ki, İŞİD 2014-cü ilin yayında İraqın üçdə birini zəbt etsə də, 2017-ci ilin dekabr ayında bütün ərazilərini itirərək, gizli sığınacaqlarına geri çəkilib.