Lavrov İordaniyadan sonra Birləşmiş Ərəb Əmirliklərinə gedib

Bakı, 4 noyabr, SalamNews, S.Bağırov. Rusiyanın xarici işlər naziri Yaxın Şərqə səfəri çərçivəsində Birləşmiş Ərəb Əmirliklərinə gedib.

SalamNews BƏƏ mətbuatına istinadən xəbər verir ki, əmirliyin xarici işlər naziri Abdullah bin Zayid Ali-Nihyan Sergey Lavrovu Əbu-Dabidə qəbul edib.

Bu görüşdə BƏƏ ilə Rusiya arasında əməkdaşlıq və strateji tərəfdaşlıq münasibətləri, iki dost ölkənin bütün sahələrdə birgə əməkdaşlıq perspektivlərinin genişləndirilməsi istiqamətində səyləri müzakirə edilib.

Tərəflər, həmçinin ümumi maraq doğuran bir sıra məsələlərə nəzər salıb və onlar ətrafında fikir mübadiləsi aparıblar.

Bu arada BƏƏ-də səfərdə olan Lavrov Ərəb Dövlətləri Liqasının Əlcəzairdə keçirilən 31-ci zirvə toplantısının bəyanatını alqışlayıb.

Qeyd edək ki, son zamanlarda Rusiya rəsmiləri ilə Səudiyyə və BƏƏ rəsmiləri arasında görüşlər qlobal əhəmiyyət daşımağa başlayıb. Xüsusilə də Ukrayna müharibəsi fonunda Qərbin Rusiya enerjisinin alternativini təmin etmək çabasına rəğmən, Moskva, ər-Riyad və Abu-Dabi rəsmilərinin “Opek+” qrupu çərçivəsində ABŞ-ı qəzəbləndirən addımlar atması xüsusi əhəmiyyət kəsb edir.