Netanyahu Livanla İsrail arasında əldə edilən sazişdən çıxacağı ilə hədələyib

Bakı, 31 oktyabr, SalamNews, S.Bağırov. Likud partiyasının lideri Benyamin Netanyahu seçkilərdə qalib gələcəyi təqdirdə Livanla-İsrail arasında dəniz sərhədlərinin müəyyənləşdirilməsi ilə bağlı əldə edilmiş razılaşmadan çıxacağı ilə bağlı təhdidlər yağdırıb.

SalamNews xəbər verir ki, İsrail Ordusunun Radiosuna verdiyi müsahibədə Netanyahu, partiyasının qarşıdan gələn Knesset seçkilərində qalib gələcəyi təqdirdə Livanla razılaşmanı ləğv edəcəyi ilə hədələyib.

“Mən Oslo razılaşması kimi bu müqavilə ilə də məşğul olacağam”, deyə İsrailin sabiq baş naziri bildirib ki, “Livanla imzalanmış müqavilə də təslim olmaq deməkdir.”

Netanyahu ötən ilin oktyabrındakı açıqlamalarında razılaşmanı dəfələrlə rədd etmiş, bunu “tarixi təslim” kimi qiymətləndirmişdi. O, baş nazir Yair Lapidin Hizbullahın bütün tələbləri ilə razılaşdığını, qorxduğunu və bu səbəbdən də təslim olduğunu demişdi.

Qeyd edək ki, ötən ay Livan prezidenti Mişel Oun və İsrailin baş naziri Yair Lapid (hər biri ayrı-ayrılıqda) iki tərəf arasında dəniz sərhədlərinin demarkasiyasına dair sazişin mətnini imzalayıblar.

Livan və İsrail Aralıq dənizində neft və təbii qazla zəngin olan təxminən 860 kvadrat kilometr ərazinin statusunu müyyənləşdirmək üçün dəniz sərhədinin demarkasiyası ilə bağlı ABŞ-ın vasitəçiliyi ilə danışıqlar aparıblar. İsrail, Hizbullah hərəkatının münaqişəli Kariş qaz yatağı üzərində PUA-larını uçurandan sonra Livanla bu barədə danışıqlara gedib.