İmamların müqəddəs hərəmlərində Məhəmməd Peyğəmbərin (s) mövluduna hazırlıq görülür (FOTO)

Bakı, 11 oktyabr, SalamNews, S.Bağırov. İraq və İranda İmamların müqəddəs hərəmlərində qarşıda gələn Məhəmməd Peyğəmbərin (s) mövlud gününə hazırlıq görülür.

SalamNews xəbər verir ki, hicri-qəməri təqvimi ilə bu gün 1444-cü ilin rəbiul-əvvəl ayının 14-dür. Azərbaycan da daxil olmaqla bir sıra müsəlman ölkələrində Məhəmməd Peyğəmbərin (s) mövludu rəbiul-əvvəl ayının 17-də qeyd edilir.

Artıq bu əlamətdar mövlud günündə mərasimlərin keçirilməsi üçün hazırlıqlar görülür. İraqda və İranda imamların hərəmlərində bu hazırlıq işləri aparılır.

Xüsusilə də İraqın Kərbəla şəhərində İmam Hüseynin (ə), Nəcəf-Əşrəf şəhərində İmam Əlinin (ə), eləcə də Samirra və Kazimeyn şəhərlərində digər imamların hərəmlərində bir sıra hazırlıq işləri aparılıb.

İmam Əlinin (ə) hərəmində Məhəmməd Peyğəmbərin (s) mübarək mövluduna aid banerlər asılıb.

Müasir dövrdə müsəlman dünyası Peyğəmbərin (s) mövludunun daha da əzəmətli şəkildə keçirilməsinin əhəmiyyətinə varıb. Bu məsələ Məhəmməd Peyğəmbərin (s) mübarək vücudunun İslam dünyası üçün birləşdirici və vəhdət yaradan amil olmasına görədir. Zaman keçdikcə və müsəlman dünyasındakı parçalanmalar onlara qarşı zülmün artmasına səbəb olduqca, İslam dünyası peyğəmbərinin mübarək vücudunun və onun vəhdətlə bağlı mesajlarının nə qədər əhəmiyyət kəsb etdiyini görür və bundan sonra da görməlidir. Bu gün İslam dünyasında fərqli ölkələrdə keçirilən vəhdət həftəsi günləri və bu mövzu ilə bağlı konfranslar və tədbirlərin yekun bəyanatları da deyildiyi kimi icra edilməlidir. Bu, İslam dünyasının yenidən dirçəlişi üçün bir zərurətdir.