Taliban Məşhəddə İmam Rzanın hərəmində din xadimlərinə hücumu pisləyib

Bakı, 7 aprel, SalamNews, B.Samid. Taliban hökuməti Məşhəddə İmam Rzanın hərəmində bir əfqanıstanlının iranlı din xadimlərinə hücum etməsini pisləyib.

SalamNews xəbər verir ki, bu barədə Taliban hökumətinin sözçüsü Zəbihulla Mücahid rəsmi tvitter hesabında yazıb.

O deyib:

“İslam Əmirliyi İranda din xadimlərinə və ibadət məkanlarına hücumu məhkum edir.”

Sözügedən hücumu pisləyən Z. Mücahid əlavə edib ki, bu hücumun əfqanlara və Əfqanıstana aidiyyatı yoxdur.

Xatırladaq ki, iki gün öncə İmam Rzanın hərəmində soyuq silahla din xadimlərinə qarşı terrora əl atan şəxsin Əfqanıstan vətəndaşı və özbək əsilli olduğu bəlli olub. Dindirmələrdən sonra, onun radikal sələfi düşüncəli və təkfirçi olduğu müəyyən edilib.

Qeyd edək ki, iki gün öncə hücuma məruz qalan məşhədli din xadimlərindən biri höccətül-islam Aslani artıq şəhid olub. Məlumata görə, o və hücuma məruz qalan digər iki din xadimi Xorasan-Rəzəvi əyalətində yardım təşkilatları ilə işləyirmişlər.

Əlavə edək ki, bu hadisədən öncə İranın Qonbəd-Kavus bölgəsində iki əhlü-sünnə din xadiminə də hücum edilmiş və onlar yaralanmışdı. İranlı ekspertlər bu hücumların planlaşdırıldığını bildirirlər.