Qəddafinin oğlundan sonra general Haftar da Liviyada prezidentliyə namizədliyini verir

Bakı, 23 sentyabr, SalamNews, B.Samid. General Xəlifə Haftar Liviyada cari ilin sonunda keçiriləcək prezident seçkilərinə namizədliyini elan edəcək.

SalamNews RT.Arabic-ə istinadla xəbər verir ki, bu barədə Xəlifə Haftarın nəzarətində olan ordu mənbələri məlumat veriblər.

Bildirilib ki, general Xəlifə Haftar “Liviya Milli Ordusu”nun komandanlığından istefa verdikdən sonra, prezidentliyə namizədliyini də elan edəcək.

Qeyd edək ki, Liviyada prezident seçkiləri gələn dekabr ayının 24-də keçiriləcək.

Bundan öncə sabiq diktator Müəmmar Qəddafinin oğlu Seyful-İslam Qəddafi də prezidentliyə namizədliyini verəcəyini bildirib.

Xatırladaq ki, Liviyanın Tubruq şəhərində yerləşən parlamenti, dövlət dairələri paytaxt Tripolidə yerləşən hökumətə verdiyi etimadı geri götürüb və bu da öz növbəsində ölkədə yeni siyasi böhranın baş verməsinə səbəb olub.