Gürcüstanda yaşayan müsəlmanlar etiraz bəyanatı yayıb

Bakı, 30 yanvar, SalamNews, M.Sadiq. Gürcüstanda yaşayan müsəlmanlar Türkiyənin "Kanal ON4" və "Kanal 12" televiziya kanallarının bağlanması qərarı ilə bağlı narahatlıqlarını bildiriblər.

Gürcüstan Ruhaniləri Heyətindən SalamNews-a verilən məlumatda deyilir ki, 23 Yanvar 2017-ci il tarixdə Türkiyədə fəaliyyət göstərən "Kanal ON4" və "Kanal 12" TV-lərin yayımının əsassız ittihamlarla dayandırılması xəbəri Türkiyə, Azərbaycan və dünyanın bir çox yerlərində olan çoxsaylı izləyicilər kimi, Gürcüstanda yaşayan müsəlmanları də məyus edib:

"Türkiyə Cümhuriyyətində yaşayan Əhli-beyt inancına mənsub vətəndaşlar həmişə öz ölkələrində millətinə, bayrağına və vətəninə sadiq şəxslər kimi tanınmışlar. Hal-hazırda Türkiyədə fəaliyyət göstərən iki minə yaxın televiziya kanalından yalnız Cəfəri inancına aid iki kanalın bağlanması qərəzli və məzhəb ayrı-seçkiliyi kimi qəbul olunur. İzləyiciləri düşündürən sual da budur ki, nəyə görə pozğunluğu yayan və insanlara heç bir fayda verməyən kanalların fəaliyyətinə toxunulmadığı halda, faydalı, maarifləndirici, qardaşlıq və birliyin yayıcısı, terror və radikalizmin əleyhinə olan kanallar isə bağlanır?

Biz Gürcüstan ruhaniləri dünya türkdilli müsəlmanlarını Quranın hidayəti, Peyğəmbər (s) sünnəti və Əhli-beytin (ə) maarifi ilə bilgiləndirən, ixtilaflı məsələlərdən hər zaman uzaq duraraq İslami məzhəblərin qardaşlığı mövzusunda mövqe sərgiləyən, izləyicilərini haqqa yönəldən, qardaş Türkiyədə barış, birlik və bərabərlik ruhunun güclənməsini qarşısına məqsəd qoyan və dini film və verilişləri ilə tanınan TV-lərin yayım haqlarının alınmasını qınayırıq.

Ümidvarıq ki, bu kanallar haqqında qəbul edilmiş yalnış qərara düzəliş edilib yenidən yayımına izn verilməklə Əhli-beyt tərəfdarlarının sevincinə səbəb olacaqlar".