Rusiya prezidentinin keçmiş köməkçisi “Oskar” mükafatına iddialıdır

Bakı, 23 noyabr, SalamNews, Ş.Nəzərli. Rusiya prezidentinin keçmiş köməkçisi Sergey Yastrjembski “Qanlı fil dişləri” sənədli filmi ilə adını “Oskar” mükafatına iddiaçıların siyahısına daxil etdirib. 

SalamNews xəbər verir ki, bu barədə Yastrjembskinin ”Yastrebfilm” şirkətinin saytında məlumat verilir. Bildirilir ki, film üzərində 30 ölkədə 3 il ərzində iş aparılıb və Afrika qitəsində vəhşi fillərin dişləri üçün gedən qanunsuz ovçuluq problemi araşdırılıb. Sənədli filmin ssenari müəllifi və prodüseri S.Yastrjembski özüdür. 

“Oskar” mükafatına təqdim olunmuş filmlərin ümumi siyahısı dekabr ayında elan olunacaq, nominantların son və qəti siyahısı gələn ilin yanvar ayında bilinəcək. Mükafat isə fevral ayında veriləcək.

“Oskar”a hələlik 145 sənədli film təqdim edilib.