Hacı Şahin Həsənli: "İmam Hüseyn (ə) məktəbi harada varsa, orada əmin-amanlıq var"

Bakı, 12 oktyabr, SalamNews. "Dünyanın dörd bir yanında keçirilən mərasimlər onu göstərir ki, İmam Hüseyn (ə) yaşadı və onun düşmənləri məhvə məhkum oldular, tarix onun qatillərinin də, özünün də qiymətini verdi."

SalamNews xəbər verir ki, bunu ilahiyyatçı Hacı Şahin Həsənli "Məşhədi Dadaş" məscidində Aşura ilə bağlı keçirilən mərasimdə deyib. O vurğulayıb ki, biz şəhidliyin zülmə, zorakılığa, təcavüzə qalib gəldiyi günü qeyd edirik. 

“İmam Hüseyn (ə) və onun məktəbi zorakılığın əleyhinədir. İmam Hüseyn (ə) uşaq başı kəsənlər, qadın-uşağa rəhm eləməyənlər qarşısında dayanıb. Bu gün də İmam Hüseynin (ə) düşmənlərinin varisləridir ki, dünyanın hər bir yerində terror törədirlər, qan tökürlər, günahsız insanları qətlə yetirirlər. Amma İmam Hüseyn (ə) məktəbi harada varsa, orada əmin-amanlıq var. Çünki İmam Hüseyn (ə) zorakılığa qarşıdır”, - deyə ilahiyyatçı qeyd edib. 

Hacı Şahin Həsənli vurğulayıb ki, İmam Hüseyn (ə) bizim böyük müəllimimizdir: “İmam Hüseynin davası, savaşı insaniyyət uğrunda idi. İmam Hüseyn (ə) bir şam kimidir. Yanır, başqalarının yolunu işıqlandırır.”