Tacikistanda zəlzələ onlarla yaşayış evini dağıdıb

Bakı, 2 iyul, SalamNews, C.Nəzərov. Tacikistanda ötən gün baş verən zəlzələ onlarla yaşayış evi və ölkənin şərqində yerləşən Rəşt rayonu ərazisindəki xalq təsərrüfatı obyektlərini qismən və ya tamamilə dağıdıb.

SalamNews-un RİA "Novosti”yə istinadla verdiyi xəbərə görə, bu barədə ölkə Fövqəladə Hallar Komitəsinin mətbuat xidməti məlumat yayıb.

Məlumata əsasən, hazırda Tacikistan baş nazirinin müavini Maxmatoir Zokirzodun rəhbərliyi altında hökumət komissiyası təbii fəlakətin baş verdiyi ərazidədir.

Tacikistan hökuməti yanında Geofizika Xidmətindən bildirilib ki, iyulun 1-də yerli vaxtla saat 19:58-də ölkə ərazisində zəlzələ baş verib. Yeraltı təkanların episentri paytaxt Düşənbədən 147 kilometr şimal-şərqdə yerləşib. Mərkəzdə zəlzələnin intensivliyi 5-6 baş təşkil edib. Düşənbədə isə zəlzələ 2 ballıq həddə hiss edilib.