Xanım Zeynəbin (ə) mövlud günüdür

Bakı, 14 fevral, SalamNews. Bu gün İslam Peyğəmbərinin (s) nəvəsi, Kərbəla həqiqətlərini dünyaya çatdıran, Kərbəla səhnəsinin misilsiz qadın qəhrəmanı Həzrət xanım Zeynəbin (ə) mövlud günüdür.

SalamNews-un məlumatına görə, hicrətin 6-cı ilində, cəmadiül-əvvəlin ayının 5-də Mədinə şəhərində Peyğəmbər ailəsində, İmam Əli (ə) və Peyğəmbərin qızı xanım Fatimeyi Zəhranın (ə) evində bir qız uşağı dünyaya gəlir. Həzrət Peyğəmbər (s) yeni doğulmuş körpənin adını Cəbrayıl (ə) nazil olub xəbər gətirəndən sonra Zeynəb qoyur.

"Zeynəb" kəlməsi ərəb leksikasında "atanın zinəti" anlamına gəlir.

Həzrət Zeynəb (ə) beş ilə qədər Peyğəmbərlə (s) bir yerdə yaşayıb. Bu müddət onun Peyğəmbər (s) səhabələrindən hesab olunmasına kifayətdir və bu da bu barədə yazılmış kitablarda ətraflı qeyd olunub.

Mənbələrdə xanım Zeynəb(ə) son dərəcə dözümlü, güclü və səbirli qadın kimi xatırlanır. Kərbəlada İmam Hüseyn (ə) və əshabına qarşı törədilmiş cinayətlərin sonradan dünyaya çatdırılmasında da xanım Zeynəbin (ə) müstəsna rolu olub.

Bu mübarək mövlud günü münasibətilə bütün möminləri, xüsusilə də xanımları təbrik edirik!