Kiyevdə Quranın Ukrayna dilində ilk nəşri hazırlanır

Bakı, 6 fevral, SalamNews. Kiyevdəki “Osnovı” nəşriyyat evi mart ayının əvvəlində müqəddəs Qurani-Kərimin Ukrayna dilinə ilk tam tərcüməsini təqdim edəcək.

SalamNews Ukrayna mətbuatına istinadla xəbər verir ki, bu barədə Nəşriyyat evinin direktoru Dana Pavlıçko məlumat verib: “Quran təkcə islamın əsas kitabı deyil, o, dünya irsinin bir hissəsidir. Bu nəşr hər bir evin kitabxanasında olmalıdır.

Ukrayna çoxmillətli dövlətdir. Quran elə bir kitabdır ki, bizim bir-birimizi daha yaxşı anlamağımıza və tanımağımıza kömək edəcək.”

Quranı qədim Ukrayna dilinə tərcümə etməyə hələ XVII əsrdə cəhd göstərilib. Lvovlu poliqlot Aleksandr Abrançak-Lisenetski müqəddəs kitabı müasir Ukrayna dilinə tərcümə etməyə çalışıb, lakin bu mətn dərc edilməyib. Budəfəki tərcümə Mədinədəki kral Fəhd adına mərkəzin komissiyası tərəfindən rəsmən təsdiq edilib. Tərcüməni tarix elmləri namizədi Mixail Yakuboviç həyata keçirib.

M.Yakuboviç deyib: “Ukraynada Quranın ərəb dilindən birbaşa tərcüməsi olmayıb. Yalnız bəzi fraqmentlər tərcümə edilib, onlar da kifayət qədər uğurlu olmayıb. Mən islam dini leksikası üzərində uzun müddət işləmişəm. Elə anlayışlar seçmişəm ki, onlar həm ukraynalı oxucu üçün anlaşıqlı olsun, həm də orijinalın mahiyyətini əks etdirsin."