AZƏRBAYCAN » MƏDƏNİYYƏT
19 Oktyabr 2021, 10:10 (GMT +4)

“Qremmi” mükafatı laureatı “Kremerata Baltika” kamera orkestri Heydər Əliyev Mərkəzində çıxış edəcək

Bakı, 19 oktyabr, SalamNews. Noyabrın 30-da Heydər Əliyev Mərkəzində “Qremmi” mükafatı laureatı “Kremerata Baltika” kamera orkestrinin konserti olacaq.

SalamNews-un məlumatına görə, “Nizami Gəncəvi İli” çərçivəsində keçiriləcək klassik musiqi gecəsində Əməkdar artist Fuad İbrahimovun dirijorluğu ilə F.Şopen, F.Mendelson, F.Əmirov və digər tanınmış bəstəkarların əsərləri səsləndiriləcək.

Konsertdə solistlər - beynəlxalq müsabiqələr laureatı, 17-ci Beynəlxalq Frederik Şopen Musiqi Müsabiqəsinin diplomatı Georgi Osokin (fortepiano), Əməkdar artist Elvin Hoca Qəniyev (sktipka) çıxış edəcək.

Dünyaca məşhur skripka ifaçısı Gidon Kremer 1997-ci ildə yaratdığı “Kremerata Baltika” kamera orkestrinə Latviya, Litva və Estoniyadan olan 23 istedadlı gənc musiqiçini cəlb edib. “Kremerata Baltika” ilk dəfə 1997-ci ildə Avstriyada keçirilən Lokenhaus festivalındakı çıxışı ilə yadda qalıb. Dərhal tamaşaçıların rəğbətini qazanan musiqi kollektivi dünyada fərqli ifaları ilə seçilir. Bu gün Avropanın tanınmış beynəlxalq orkestrlərindən biri olan “Kremerata Baltika” dünyanın 50-dən çox ölkəsində, 600 şəhərində mindən çox konsert proqramı ilə çıxış edib.

“Kremerata Baltika”nın Bakı konsertinə biletləri Heyər Əliyev Mərkəzinin kassasından, iTicket.az saytı və kassalarından əldə etmək mümkündür.