AZƏRBAYCAN » İQTİSADİYYAT
28 Aprel 2017, 16:43 (GMT +4)

Havalar soyuq keçdiyindən, dərinə düşmüş toxumların cücərməsi ləngiyib - KTN

Bakı, 28 aprel, SalamNews. Dövlət Fitosanitar Nəzarət Xidməti Tovuzda kartof əkini ilə bağlı yaranmış problemə aydınlıq gətirib.

SalamNews xəbər verir ki, Kənd Təsərrüfatı Nazirliyi yanında Dövlət Fitosanitar Nəzarəti Xidmətinin mütəxəssisləri Tovuz rayonu, Alakol kənd sakinləri Mübariz Abbasov və Fərman Yəhyayevin müraciəti əsasında həmin kənddə olublar.

Baxış zamanı müəyyən olub ki, havaların soyuq keçməsi nəticəsində sahələrdə əkin zamanı dərinə düşmüş toxumların cücərməsi və bitkilərin inkişafı ləngiyib.

Fermerlərlə aparılan söhbət zamanı toxumların cücərməsində yaranan problemlərin əsas səbəbləri aydın olub. Belə ki, kartof məhsulunun Rusiyanın Kamerov vilayətindən ərzaqlıq məqsədilə gətirildiyi, ancaq toxumluq materialı kimi istifadə olunduğu, eyni zamanda Qərb bölgəsində kartof bitkisinin optimal əkin müddəti martın 5-20-də  həyata keçirildiyi halda, fevralın 1-dən etibarən əkildiyi məlum olub.

Səpin vaxtı aqrotexniki qaydalara əməl olunmaması, torpağın düzgün hazırlanmaması, toxumun əkini zamanı cərgələrin dərinliyinin düzgün seçilməməsi, toxumun dərin basdırılması, torpaq örtüyünün qalın olması və torpaqda temperaturun çoxillik normadan aşağı olması kartofun vaxtında cücərməməsinə səbəb olub.

Mütəxəssislər əkin sahələrindən toxum, bitki və torpaq nümunələri götürərək analiz məqsədi ilə Dövlət Fitosanitar Nəzarəti Xidmətinin Respublika Karantin Ekspertiza Mərkəzinə təqdim ediblər.

Müvafiq laboratoriyalarda aparılan müayinələr zamanı nümunələrdə kartof bitkisinin inkişafına mənfi təsir edən xəstəlik və zərərvericilər aşkar olunmayıb.

Aparılan araşdırmalardan sonra mütəxəssislər fermerlərə və təsərrüfat sahiblərinə ərzaqlıq kartof məhsulundan toxum materialı kimi istifadə edilməsinin düzgün olmadığını, sertifikatlı kartof toxumundan istifadənin üstünlükləri, həmçinin səpin normaları, becərmə üsulları, xəstəlik və zərərvericilərlə mübarizə tədbirləri barədə geniş məlumat veriblər.